«Арсенал» ҳужумчиси Кай Хаверц лондонликлар сафидаги келажаги борасидаги саволларга жавоб берди.

26 ёшли футболчи турли миш-мишларга қарамай, «канонирлар» лагерини тарк этиш ниятида эмаслигини таъкидлади.

«Тўғрисини айтсам, бу ҳақда ҳеч нарса эшитмадим ва ўқимадим. «Арсенал»да ўзимни худди ўз уйимдагидек ҳис қиляпман ва ўйлайманки, клуб ҳам мендан мамнун. Бу мавсум осон кечмаяпти, лекин мен келажагимни албатта «Арсенал»да кўряпман», — деди Хаверц Германия терма жамоасининг Швейцарияга қарши ўйини олдидан ўтказилган матбуот анжуманида.

Эслатиб ўтамиз, ҳужумчи мавсумнинг биринчи ярмини деярли тўлиқ жароҳат туфайли ўтказиб юборган эди. У Микель Артета жамоаси сафида 14 та ўйинда майдонга тушиб, 3 та гол урди ва 2 та голли узатмани амалга оширди.