Argentina terma jamoasi bosh murabbiyi Lionel Skaloni Lionel Messining JCH-2026 turnirida ishtirok etishi borasida hali aniq to‘xtamga kelmaganini bildirdi.

«Bu savolni ko‘proq uning o‘ziga berish kerak. Mening fikrimni esa yaxshi bilasiz. Uning maydonga tushishi uchun qo‘limdan kelgan barcha ishni qilaman. Menimcha, futbol rivoji uchun ham u musobaqada qatnashishi shart. Qarorni men emas, uning o‘zi ruhiy va jismoniy holatidan kelib chiqib qabul qiladi.

Vaziyat murakkab, chunki uni nafaqat argentinaliklar, balki butun dunyo ko‘rishni istaydi. Shaxsan men uning u yerda bo‘lishini xohlayman. Lekin baribir yakuniy so‘zni o‘zi aytadi. U xotirjam qaror qabul qilish huquqini allaqachon qo‘lga kiritgan.

Biz shoshilmayapmiz. Bilamizki, u o‘zi uchun ham, jamoa uchun ham foydali bo‘ladigan qarorni qabul qiladi. Uning o‘ynashidan umidvormiz», — dedi Skaloni.