«Liverpul»ning chap qanot himoyachisi Endryu Robertson «Milan» qiziqishlari doirasiga tushib qoldi.

32 yoshli futbolchi «qizillar» safini erkin agent sifatida tark etishi mumkin — uning shartnomasi joriy mavsum yakunida o‘z nihoyasiga yetadi. Jurnalist Ekrem Konurning xabar berishicha, «Milan» shotlandiyalik futbolchini o‘z safiga qo‘shib olish imkoniyatini ko‘rib chiqmoqda. Italiya grandi rahbariyati Pervis Estupinyanning kelajagiga shubha bilan qaramoqda, shu sababli bozordagi turli variantlarni o‘rganmoqda.

Shuningdek, Endryu Robertson nomi Madridning «Atletiko» va «Tottenxem» klublari bilan ham bog‘lanmoqda. Uning o‘z vataniga qaytishi ham istisno etilmaydi, u yerda «Seltik» futbolchiga da’vogarlik qilmoqda. Lateral «Liverpul» sharafini 2017 yildan beri himoya qilib keladi.