Londonning “Arsenal” klubi bosh murabbiy Mikel Arteta bilan yangi shartnoma bo‘yicha muzokaralarning yakuniy bosqichida turibdi.

Matchday Central nashri xabariga ko‘ra, taklif etilayotgan kelishuv uning klubdagi faoliyatini yana olti yilga uzaytiradi va unda mutaxassis 2033 yilgacha jamoani boshqarishi belgilangan.

Ma’lumot uchun, ispaniyalik mutaxassisning amaldagi shartnomasi 2027 yilning yoziga qadar mo‘ljallangan. 44 yoshli murabbiy 2019 yildan buyon “to‘pchilar”ni boshqarib kelmoqda. Jamoa uning qo‘l ostida barcha musobaqalar doirasida 339 ta o‘yin o‘tkazib, 210 ta g‘alaba, 58 ta durang va 71 ta mag‘lubiyat qayd etgan.

Avvalroq, terma jamoalar ishtirokidagi o‘yinlar o‘tkaziladigan xalqaro tanaffusdan so‘ng “Arsenal” klubining 11 nafar futbolchisi jarohat bilan qaytgani xabar qilingan edi.

Ayni damda “kanonirlar” Angliya Premyer Ligasi turnir jadvalida birinchi o‘rinni egallab turibdi. Jamoa hisobida 70 ochko mavjud. “To‘pchilar”, shuningdek, Angliya Kubogi va UYEFA Chempionlar Ligasida ham ishtirokini davom ettirmoqda.