Madridda quriladigan sakkiz ming tomoshabinga mo‘ljallangan zamonaviy arena “Katta dubulg‘a” turkumidagi turnirlarning 22 karra g‘olibi, ispaniyalik Rafael Nadal sharafiga nomlanishi mumkin. Bu haqda Madrid Masters turniri direktori Felisyano Lopes ma’lum qildi.

“Hozircha bu borada yakuniy qaror qabul qilingani yo‘q. Balki homiy paydo bo‘lar yoki stadion o‘yinchi nomi bilan atalar. Biz uchun stadionga Rafael Nadal nomini berish sharaf bo‘lar edi. Bizda allaqachon Manolo Santana va Arancha Sanches nomidagi arenalar bor, ular qatoriga Rafaelni qo‘shish biz uchun ulkan sharafdir”, deydi Lopes.

Avvalroq Nadal Madrid politexnika universiteti (La UPM) tomonidan berilgan faxriy doktorlik darajasi bilan taqdirlangani xabar qilingan edi.

Ma’lumot uchun, Rafa Professional tennischilar assosiasiyasi (ATP) talqiniga ko‘ra 209 hafta davomida dunyoning 1-raqamli tennischisi bo‘lib turgan va besh marta yilni peshqadam sifatida yakunlagan. Nadal 92 ta ATP turniri g‘olibligini, shu jumladan, 22 ta “Katta dubulg‘a” (shundan 14 tasi Fransiyadagi “Rolan Garros” turniridan), 36 ta Masters seriyasidagi g‘alaba va Olimpiya oltin medalini qo‘lga kiritgan. Uning tuproqli kortlardagi ketma-ket 81 ta g‘alabasi ochiq era davridagi bitta qoplamali kortlarda qayd etilgan eng uzun g‘alabali seriya hisoblanadi.