"Real"ning sobiq yarim himoyachisi Guti o‘z vaqtida "Milan"ga o‘tishdan qanday bosh tortgani haqida gapirib berdi.

"Milan" menga "Real"da topganimdan ko‘ra ko‘proq pul taklif qilgandi, lekin meni pul ruhlantirmasdi. Men boshqa klubda 90 daqiqa o‘ynagandan ko‘ra, "Real"da 30 daqiqa maydonga tushishni afzal ko‘rganman", — deya Gutining so‘zlarini keltiradi Madrid Xtra.

Guti "Real" tarbiyalanuvchisi hisoblanadi. U "qaymoqranglilar" safida 1996 yildan 2010 yilgacha to‘p tepgan. Yarim himoyachi madridliklar safida jami 542 ta o‘yin o‘tkazib, 77 ta gol urgan va 96 ta golli uzatmani amalga oshirgan.

"Real" tarkibida Guti besh marta Ispaniya chempioni, to‘rt marta Ispaniya Superkubogi, uch marta Chempionlar ligasi, ikki marta Qit’alararo kubok va bir marta UYEFA Superkubogi sohibiga aylangan.