Braziliya terma jamoasining sobiq hujumchisi Aleshandre Pato faoliyatining ilk bosqichida jahon chempioni Ronaldo bilan qiyoslanishi, shuningdek, o‘zini to‘liq ko‘rsatishiga xalaqit bergan jarohatlar haqida gapirib berdi.

"Agar bolaligingizda Braziliyada yashasangiz va futbolda biror ajoyib ish qilsangiz, odamlar sizga yangi Pele yoki Ronaldo ekaningizni aytishadi. Men "Milan"ga o‘tganimda ham shunday deyishgandi: "Oh, bu xuddi yangi Ronaldo-ku!" Lekin men hech qachon o‘zimni bunday his qilmaganman. Men shunchaki futbol o‘ynashni yaxshi ko‘rganim uchun mashq qilardim. Dunyoning eng zo‘r ustalari yig‘ilgan jamoada to‘p surardim.

Jarohatlar — futbolchilik faoliyatining eng og‘ir jihatlaridan biridir. Odamlar faqat o‘yinlarni ko‘rishadi, lekin jarohatdan tiklanayotgan futbolchilarning uzun ro‘yxatiga e’tibor berishmaydi. Bunday vaziyatda sen faqat maydonga qaytishni xohlaysan. Birinchi, ikkinchi, uchinchi jarohatlarimdan keyin bir-ikkita o‘yinda qatnashardim va yana shikastlanardim", — deya Patoning so‘zlarini keltiradi The Athletic.