Braziliya terma jamoasi o‘rtoqlik uchrashuvida Xorvatiya ustidan 3:1 hisobida g‘alaba qozondi.
«Shaxmatchilar» 84-daqiqada hisobni tenglashtirishgan edi, biroq Karlo Anchelotti shogirdlari o‘yin so‘nggida ikkita gol urib, g‘alabani ilib ketishdi.
Bahs yakunlangach, «pentakampeonlar» ustozi Madridning «Real» klubidagi birgalikdagi faoliyati orqali yaxshi taniydigan shogirdi Luka Modrichga yuzlandi: «Sening braziliyalik bobong yo‘qmi mabodo?» – deya hazil aralash so‘radi Anchelotti. Bu haqda Ispaniya OAVlari xabar bermoqda.
40 yoshli Modrich uchrashuvning 60-daqiqasiga qadar harakat qildi va shundan so‘ng almashtirildi. Eslatib o‘tamiz, o‘tgan yilning yozida xavbek «Real»ni tark etib, erkin agent sifatida «Milan»ga o‘tgan edi.
