Angliya terma jamoasi bosh murabbiyi Tomas Tuxel 2026 yilgi Jahon chempionati uchun jamoa tarkibidan hech kimga, jumladan, Fil Fodenga ham joy kafolatlanmaganini ma’lum qildi.
Murabbiy jurnalistlarning «Manchester Siti» futbolchisining o‘yini haqidagi tegishli savoliga shunday javob berdi.
«Bu unga tarkibdan joy avtomatik tarzda kafolatlanganini anglatmaydi. Men u bizni hayron qoldirishini hamda xuddi shunday ishtiyoq va g‘ayrat bilan harakat qilishini kutgandim, ammo hozircha u o‘z imkoniyatlarini to‘liq namoyon eta olmayapti», — deya Tuxelning so‘zlarini keltiradi BBC.
Eslatib o‘tamiz, kuni kecha Angliya terma jamoasi o‘rtoqlik uchrashuvida Yaponiyaga 0:1 hisobida imkoniyatni boy berdi.
Jahon chempionatida inglizlar Xorvatiya, Gana va Panama terma jamoalari bilan bir guruhdan joy olishgan.
