Angliya futbol assosiasiyasi (FA) 2025 yil fevralidan 2026 yil fevraligacha bo‘lgan davr uchun ma’lumotlarni e’lon qildi. Unga ko‘ra, ushbu davr mobaynida APL klublari tomonidan agentlarga 460 million funt sterlingdan ortiq mablag‘ o‘tkazib berilgan.
«Chelsi» ushbu ko‘rsatkich bo‘yicha barchani ortda qoldirdi va agentlarga APL uchun rekord darajadagi 65 million funt to‘ladi.
Ro‘yxatda keyingi o‘rinni agentlar uchun 38,4 mln funt sarflagan «Aston Villa» egalladi. Keyingi o‘rinlardan «Manchester Siti» (37,36 mln), «Liverpul» (33,8 mln), «Arsenal» (32,15 mln), «Manchester Yunayted» (31,78 mln), «Vulverxempton» (25,96 mln), «Tottenxem» (21,38 mln) va boshqalar joy oldi.
APL klublari orasida eng so‘nggi o‘rinni «Byornli» egalladi — klub 12 oy ichida agentlarga 7,36 million funt to‘lagan.
Shuningdek, FA xabariga ko‘ra, Chempionship klublari ushbu davrda agentlik to‘lovlari uchun 69,7 mln funt sarflagan bo‘lsa, Birinchi liga jamoalari uchun bu raqam 14 mln funtni, Ikkinchi liga jamoalari uchun esa 2,6 mln funtni tashkil etdi.
