Leverkuzenning «Bayer» klubi «Kristal Pelas» bosh murabbiyi Oliver Glasnerga qiziqish bildirmoqda. Bu haqda Bild nashri xabar bermoqda.
Manbaning ma’lumotlariga ko‘ra, avstriyalik mutaxassis «Bayer» rahbariyati tomonidan murabbiylik posti uchun asosiy nomzod sifatida ko‘rilmoqda. Leverkuzen klubi boshliqlarining fikricha, u jamoaning hozirgi ustozi Kasper Yulmann o‘rnini egallashi mumkin.
Ma’lumki, Glasner mavsum yakunida «Kristal Pelas» bosh murabbiyi lavozimini tark etadi. Shu bilan birga, mutaxassis Angliyadan ketmoqchi emasligi qayd etilgan.
Eslatib o‘tamiz, Glasner avval ham Germaniyada faoliyat yuritgan. U Frankfurtning «Ayntraxt» va «Volfsburg» jamoalarini boshqargan. Shu yozda avstriyalik murabbiy 52 yoshni qarshi oladi.













