«Barselona» va «Sevilya» klublarida o‘ynagan sobiq yarim himoyachi Ivan Rakitich «Real»ning sobiq bosh murabbiyi Xabi Alonsoning faoliyati haqida fikr bildirdi.
«Ha, bu juda achinarli holat. Men Xabini “Real”da, ayniqsa La Ligada, uzoqroq ko‘rishni istardim. Bu yerda qaysi jamoaga muxlis ekaningiz muhim emas — “Barselona”, “Real” yoki “Sevilya”. Men chindan ham afsusdaman, chunki u men uchun futboldagi eng muhim murabbiylardan biri bo‘lib qoladi.
U qayerga bormasin, albatta muvaffaqiyat qozonadi. Katta klublardagi bosimni tushunaman: u “Leverkuzen”da ajoyib ishladi va shundan so‘ng tez orada “Real”dan taklif oldi. Uning tezroq qaytishini umid qilaman. Men Xabini murabbiy sifatida ko‘rishni va undan o‘rganishni istardim», — dedi Rakitich AS nashriga bergan intervyusida.
Eslatib o‘tamiz, 12 yanvar kuni «Real» klubi Xabi Alonso bilan hamkorlik o‘zaro kelishuv asosida to‘xtatilganini rasman e’lon qilgan edi.













