«Барселона» ва «Севилья» клубларида ўйнаган собиқ ярим ҳимоячи Иван Ракитич «Реал»нинг собиқ бош мураббийи Хаби Алонсонинг фаолияти ҳақида фикр билдирди.

«Ҳа, бу жуда ачинарли ҳолат. Мен Хабини “Реал”да, айниқса Ла Лигада, узоқроқ кўришни истардим. Бу ерда қайси жамоага мухлис эканингиз муҳим эмас — “Барселона”, “Реал” ёки “Севилья”. Мен чиндан ҳам афсусдаман, чунки у мен учун футболдаги энг муҳим мураббийлардан бири бўлиб қолади.

У қаерга бормасин, албатта муваффақият қозонади. Катта клублардаги босимни тушунаман: у “Леверкузен”да ажойиб ишлади ва шундан сўнг тез орада “Реал”дан таклиф олди. Унинг тезроқ қайтишини умид қиламан. Мен Хабини мураббий сифатида кўришни ва ундан ўрганишни истардим», — деди Ракитич AS нашрига берган интервьюсида.

Эслатиб ўтамиз, 12 январь куни «Реал» клуби Хаби Алонсо билан ҳамкорлик ўзаро келишув асосида тўхтатилганини расман эълон қилган эди.