«Komo»ning hujumkor yarim himoyachisi Nikolas Pasning Madridning «Real» klubiga qaytishi faqat vaqt masalasi deb hisoblanmoqda.

Avvalroq turli manbalar «qaymoqranglilar» o‘z tarbiyalanuvchisini joriy mavsum yakunida qaytarib olmoqchi ekanligi haqida xabar bergan edi. Transfer News Live nashrining El Mundo’ga tayanib ma’lum qilishicha, «Real» Pasning shiddatli o‘sishini to‘xtatib qo‘yishni istamayapti, shu sababli qayta sotib olish huquqidan foydalanish uchun 2027 yil yozigacha kutishga tayyor.

21 yoshli argentinalik futbolchi A Seriyada mavsumning asosiy kashfiyotlaridan biriga aylandi. Sesk Fabregas boshqaruvidagi «Komo» jamoasi esa Chempionlar ligasi yo‘llanmasi uchun kurashmoqda.

Eslatib o‘tamiz, «Real» kelayotgan mavsumlar oralig‘ida Nikolas Pasni bor-yo‘g‘i 8 million yevro evaziga qayta sotib olishi mumkin.