«Barselona» himoyachisi Joau Kanselu ijara shartnomasi muddati tugaganidan keyin ham klubda qolishi mumkin. Portugaliyalik futbolchi hali ham «Al-Hilol»ga tegishli bo‘lsa-da, Topskills Sports UK ma’lumotlariga ko‘ra, Kataloniya grandi vakillari agent Jorje Mendeshga futbolchini olib qolish niyatida ekanliklarini ma’lum qilishgan. Kanseluning o‘zi ham «Barsa»da qolishni astoydil istamoqda — u klubning ashaddiy muxlisi va Kataloniyada o‘zini baxtli his qilmoqda.

«Ko‘k-anorranglilar» allaqachon «Al-Hilol» bilan muzokaralarni boshlab yuborishgan, hozircha ular faqat og‘zaki ko‘rinishda olib borilmoqda. 31 yoshli futbolchining Saudiya klubi bilan amaldagi shartnomasi kelasi yilning o‘rtalarida nihoyasiga yetadi. Transfermarkt portali uning bozor qiymatini 9 million yevroga baholamoqda.