Rossiyalik taniqli murabbiy Yuriy Syomin "Sport ekspress" nashriga bergan intervyusida O‘zbekiston milliy jamoasi va Abduqodir Husanov haqidagi savollarga javob berdi.

— Agar O‘zbekiston terma jamoasi jahon chempionati oldidan murabbiy almashtirayotganda Fabio Kannavaro o‘rniga sizni taklif qilganida — rozi bo‘larmidingiz? Tavakkal qilarmidingiz?

— Nega endi yo‘q? Albatta, rozi bo‘lardim! Men o‘zbeklarga muxlislik qilaman. Ular bizning eng yaqin qo‘shnilarimiz va do‘stlarimiz. Ular jahon chempionatlarida debyut qiladi va guruhdan chiqish ular uchun katta yutuq bo‘ladi. Bu qiyin, ammo mumkin. Buni ko‘rish uchun Abduqodir Husanovning "Manchester Siti"da qanday o‘ynayotganiga qarashning o‘zi yetarli.

Bu men uchun to‘liq kashfiyot bo‘ldi! Axir u darhol “Siti”ga kelib qolmagan. Avval O‘zbekistonda o‘ynagan, keyin Belarusga o‘tgan, u yerdan Fransiyaga, keyin esa Angliyaga yo‘l olgan. Shunda savol tug‘iladi: bizning seleksionerlar qayerda edi? Qanday qilib bunday futbolchini ko‘rmay qolish mumkin? Futbolchi va o‘yinni ko‘ra bilish kerak-da!

Pep Gvardiola esa bu olmosni ko‘ra oldi va uni jamoasiga oldi. Husanov markaziy himoyada ham, qanotda ham sifatni yo‘qotmasdan o‘ynay oladi — bu juda kam uchraydigan holat. U juda yosh bo‘lishiga qaramay, bunday darajadagi murabbiy unga eng muhim o‘yinlarda ishonch bildirmoqda. Bu esa "Manchester Siti"dek jamoada — to‘lgan tribunalar, kuchli raqiblar, katta bosim sharoitida sodir bo‘lyapti!

— Husanovni “Siti”da ikki marta oy futbolchisi deb tan olishdi.

— Ana ko‘rdingizmi — zo‘r yigit! Lekin eng muhimi — uni ko‘ra bilish edi. Qaysi mamlakatdan ekaniga qaramay. Qanday qilib u bizning liga orqali o‘tmay ketdi? Menimcha, agar uni O‘zbekistondan RPL klublaridan biri chaqirganida, albatta borgan bo‘lardi. Ammo uni ko‘rishmadi — muammo ham shunda.