«Milan» A Seriyasining navbatdagi turida o‘z maydonida kutilmaganda «Udineze»ga 0:3 hisobida imkoniyatni boy berdi.
Mehmonlar tanaffusga qadar ikki bor raqib darvozasini ishg‘ol qilishdi, ikkinchi bo‘limda esa hisobni yirik ko‘rinishga keltirishdi. Massimiliano Allegri jamoasi ushbu gollarga javob qaytara olmadi.
«Taktik sxemaning o‘zgarishi haqida ko‘p gapirildi, ammo bunday holat yuz berganda muammo rasmda emas. Biz ham, muxlislarimiz kabi, juda xafamiz va g‘azabdamiz.
Biz bu mavsumda shunchaki ochko to‘plaganimiz yo‘q — bizda yetarlicha mahorat bor. Lekin hozirgidek qiyin damlarda xarakter ko‘rsatish, jipslashish va xatolarni tuzatish muhim. Bugun biz o‘z-o‘zimizga o‘xshamadik», — deya «rossonerilar» yarim himoyachisi Samuele Richchining so‘zlarini keltirmoqda TMW.
«Milan» 63 ochko bilan turnir jadvalida uchinchi o‘rinni egallab turibdi. Jamoa bittadan zaxira o‘yiniga ega bo‘lgan «Napoli» (65) va «Inter»dan (72) ortda qolmoqda.
