Italiyalik Yannik Sinner Monte-Karloda bo‘lib o‘tgan professional tennischilar uyushmasi (ATP) turkumiga kiruvchi Masters turniri finalida ispaniyalik Karlos Alkarasni mag‘lubiyatga uchratdi.

Uchrashuv 7:6, 6:3 hisobida italiyalik tennischi foydasiga yakunlandi. Turnirda 2-raqam ostida saralangan Sinner ushbu g‘alaba orqali 1-raqamli tennischi Alkarasdan ustun keldi.

24 yoshli Yannik Sinner ushbu muvaffaqiyati evaziga dunyoning birinchi raketkasi unvonini o‘ziga qaytarib oladi. Bu uning ATP shafeligidagi turnirlarda qo‘lga kiritgan 27-sovrini bo‘ldi. Italiyalik sportchi faoliyati davomida to‘rt bor “Katta dubulg‘a” turnirlarida g‘olib chiqqan: ikki marta Australian Open (2024, 2025), bir martadan US Open (2024) va “Uimbldon” (2025). Shuningdek, u 2023 va 2024 yillarda Italiya terma jamoasi tarkibida Devis Kubogini qo‘lga kiritgan.

22 yoshli Karlos Alkaras jahon reytingida 2025 yilning noyabr oyida 1-o‘ringa ko‘tarilgan edi. Ispaniyalik tennischi hisobida ATP turnirlarining 26 ta unvoni bor. Alkaras yetti marta “Katta dubulg‘a” musobaqalarida g‘olib chiqqan: US Open (2022, 2025), “Uimbldon” (2023, 2024), “Rolan Garros” (2024, 2025) va Australian Open (2026). Shuningdek, u 2024 yilgi Parij Olimpiadasining kumush medali sohibi hisoblanadi.

Monte-Karlodagi turnir tuproq qoplamali kortlarda o‘tkaziladi va nufuzi jihatidan faqat “Katta dubulg‘a” hamda Yakuniy ATP turniridan keyingi o‘rinda turadi. O‘tgan yili ushbu sovrinni aynan Alkaras qo‘lga kiritgan edi.