«Bornmut» bosh murabbiyi o‘z kelajagi borasida muhim qaror qabul qildi.

The Athletic nashrining nufuzli jurnalisti Devid Ornshteyn bergan eksklyuziv ma’lumotlarga ko‘ra, «Bornmut» ustozi Andoni Iraola ushbu mavsum yakunidan so‘ng klubni tark etishga qaror qilgan.

Qayd etilishicha, «olchalar» rahbariyati 43 yoshli ispaniyalik mutaxassisni klubda olib qolish uchun qo‘lidan kelgan barcha ishni qilgan, biroq u jamoadan ketish borasida qat’iy to‘xtamga kelgan. Hozirda «Bornmut»da yangi ustoz izlash jarayoni davom etmoqda. Ushbu lavozimga asosiy nomzodlar qatorida «Ipsvich»da faoliyat yuritayotgan Kiran Makkennaning ismi tilga olinmoqda.

Eslatib o‘tamiz, Andoni Iraola 2023 yilning iyul oyida «Bornmut» boshqaruvini qo‘lga olgan edi. Ushbu davr mobaynida u barcha turnirlarda «olchalar» bilan 121 ta o‘yin o‘tkazdi (45 g‘alaba, 35 durang va 41 mag‘lubiyat).

Ayni damda uning jamoasi APLning 32 turidan so‘ng 45 ochko bilan turnir jadvalida 11-o‘rinni egallab turibdi.