«Atletiko» prezidenti Enrike Sereso «Barselona»ning «Metropolitano» stadioni maydoni holati bo‘yicha bildirgan e’tirozlariga munosabat bildirdi.

Bugun jamoalar Madridda Chempionlar Ligasi 1/4 finali doirasidagi javob o‘yinini o‘tkazishadi. Eslatib o‘tamiz, «Kamp Nou»da kechgan birinchi bahsda «Atletiko» 2:0 hisobida g‘alaba qozongan edi. Kechagi mashg‘ulot vaqtida «Barselona» bosh murabbiyi Xans-Diter Flik UYEFA vakillariga maydondagi maysaning balandligi va gazonning haddan tashqari quruqligidan shikoyat qilgan.

«Ular turli sabablar bilan shikoyat qilishdi, lekin UYEFA hammasi joyida ekanligini aytdi. Kimgadir kalta soch turmagi yoqadi, kimgadir uzun — men uchun bular shunchaki bo‘sh gaplar. Menimcha, bu aniq va ravshan masala, UYEFA ham buni tasdiqladi.

Keyingi bosqichga chiqishimizga ishonchim komil. Biz ko‘p yillardan beri bo‘lgani kabi Simeonega to‘liq ishonamiz. Har bir o‘yin bir-biridan farq qiladi va maydonda har qanday voqea yuz berishi mumkin», — dedi Sereso.

Madriddagi «Metropolitano» stadionida bo‘lib o‘tadigan ushbu hal qiluvchi bahs Toshkent vaqti bilan tungi soat 00:00 da boshlanadi.