«Milan» jamoasi «Bavariya» yarim himoyachisi Leon Goreskani o‘z safiga qo‘shib olishga umid qilmoqda.

31 yoshli futbolchi mavsum yakunida erkin agent maqomida bo‘ladi — Myunxen grandi uning ketishini allaqachon e’lon qilgan. Jurnalist Ekrem Konurning ma’lumotiga ko‘ra, aynan Goreska «rossonerilar» ustozi Massimiliano Allegri uchun asosiy transfer maqsadi bo‘lib turibdi. Xavbekka yiliga 5 million yevro maosh bilan uch yillik shartnoma taklif etilgan. Shunga qaramay, germaniyalik futbolchiga boshqa da’vogarlar ham yo‘q emas.

Leon Goreska 2018 yildan beri «Bavariya» sharafini himoya qilib kelmoqda. Joriy mavsumda futbolchi Vensan Kompani boshqaruvidagi jamoa safida barcha turnirlarda 40 ta o‘yin o‘tkazib, 3 ta gol va 3 ta golli uzatmaga mualliflik qildi.