Jan-Filipp Matetaning «Kristal Pelas»dagi kelajagi futbolchi yangi shartnoma imzolashni rad etganidan so‘ng mavhum bo‘lib qolmoqda. Bu haqda Sky Sports xabar bermoqda.
Mateta jamoada qolish taklifini rad etgach, «Kristal Pelas» rahbariyati muzokaralarni qayta boshlashga unchalik ishtiyoq bildirmayapti. Uning amaldagi shartnomasi 2027 yilning iyun oyida yakuniga yetadi. Eslatib o‘tamiz, Fransiya terma jamoasi hujumchisi (3 o‘yin, 2 gol) o‘tgan qishda «Milan»ga o‘tishga juda yaqin kelgandi, biroq tizzasidagi muammolar sababli transfer amalga oshmay qolgandi. Jarrohlik amaliyotidan so‘ng «Lion» akademiyasi bitiruvchisi mart oyi o‘rtalarida maydonga qaytdi va aprelda yana gol urishni boshladi.
Ushbu futbolchi mavsum davomida o‘tkazilgan 40 ta o‘yinda 13 ta gol va 2 ta golli uzatmani o‘z hisobiga yozdirib qo‘ygan. Transfermarkt portali Matetaning qiymatini 35 million yevroga baholamoqda.
