Juma oqshomida «Inter» o‘z maydonida «Kalyari»ni 3:0 hisobida mag‘lub etdi. «Neradzurrilar» nafaqat chempionlik unvoni sari muhim qadam tashladi, balki A Seriyada kuchli to‘rtlikdan joy olishini ham naqd qildi. Bu esa «Inter»ning 2026/2027 yilgi mavsum uchun Chempionlar ligasi yo‘llanmasini qo‘lga kiritganini anglatadi.

Kelasi mavsumda Chempionlar ligasining umumiy bosqichida (liga bosqichida) ishtirok etadigan oltita jamoa nomi allaqachon ma’lum bo‘ldi. Hozirgacha «Barselona», «Arsenal», «Bavariya», PSV, «Real Madrid» va «Inter» klublari yo‘llanmalarga ega chiqishdi.

Ushbu jamoalardan ikkitasi — «Arsenal» va «Bavariya» Chempionlar ligasining joriy mavsumida yarim finalda bahs olib borishadi. «To‘pchilar» (Arsenal) «Atletiko Madrid»ga qarshi, myunxenliklar esa «PSJ»ga qarshi maydonga tushishadi.