Жума оқшомида «Интер» ўз майдонида «Кальяри»ни 3:0 ҳисобида мағлуб этди. «Нерадзуррилар» нафақат чемпионлик унвони сари муҳим қадам ташлади, балки А Серияда кучли тўртликдан жой олишини ҳам нақд қилди. Бу эса «Интер»нинг 2026/2027 йилги мавсум учун Чемпионлар лигаси йўлланмасини қўлга киритганини англатади.

Келаси мавсумда Чемпионлар лигасининг умумий босқичида (лига босқичида) иштирок этадиган олтита жамоа номи аллақачон маълум бўлди. Ҳозиргача «Барселона», «Арсенал», «Бавария», ПСВ, «Реал Мадрид» ва «Интер» клублари йўлланмаларга эга чиқишди.

Ушбу жамоалардан иккитаси — «Арсенал» ва «Бавария» Чемпионлар лигасининг жорий мавсумида ярим финалда баҳс олиб боришади. «Тўпчилар» (Арсенал) «Атлетико Мадрид»га қарши, мюнхенликлар эса «ПСЖ»га қарши майдонга тушишади.