«Yuventus» A Seriya doirasidagi «Bolonya»ga qarshi muhim o‘yin oldidan o‘z tarkibini kuchaytirib oldi. Tuttosport nashrining xabar berishicha, Kenan Yildiz va Kefren Tyuram jamoa bilan to‘liq mashg‘ulotlarga qaytishdi.
Yildiz so‘nggi haftalarda bezovta qilgan tizzasidagi yallig‘lanishdan so‘ng sog‘ayib ketdi. Ushbu jarohat uning «Atalanta»ga qarshi bahsda ishonchsiz o‘yin ko‘rsatishiga sabab bo‘lgan va natijada Luchano Spalletti futbolchini almashtirishga majbur bo‘lgan edi. Shundan so‘ng turkiyalik hujumchi bir necha kun davomida asosiy guruhdan alohida mashq qildi.
Tyuramning muammolari sababi ochiqlanmagan, u o‘tgan turda maydonga tushgan edi. Ushbu futbolchilarning «Bolonya»ga qarshi o‘yinda ishtirok etishi hozircha rasman tasdiqlanmadi. Ayni damda Turin klubi A Seriya turnir jadvalida 60 ochko bilan to‘rtinchi o‘rinni egallab turibdi.
