«Manchester Yunayted»ning sobiq hujumchisi Ueyn Runi «Arsenal» muxlislari o‘z jamoasini qo‘llab-quvvatlashda faolroq bo‘lishlari lozim deb hisoblaydi.

19 aprel kuni Mikel Arteta shogirdlari APL doirasida «Manchester Siti»ga imkoniyatni boy berdi (1:2).

«Menimcha, «Arsenal» muxlislari yaxshiroq bo‘lishlari kerak. «Bornmut»ga qarshi o‘yinda ular o‘z jamoasini hushtaklar bilan kutib olganini ko‘rdim. «Arsenal» butun mavsumni ajoyib o‘tkazdi, hozir esa ularda biroz pasayish kuzatilyapti.

Muxlislar ularning daldasi futbolchilar uchun naqadar muhimligini va bu qanchalik yordam berishi mumkinligini tushunishlari kerak. Futbolchilar hozirgi darajaga chiqish uchun mashg‘ulotlarda kun sayin qattiq mehnat qilishmoqda, shuning uchun yutqazganingda seni hushtakbozlik bilan kutib olishsa, bu o‘yinchilarga salbiy ta’sir qiladi.

«Arsenal» APLda g‘olib chiqishi uchun muxlislar ham o‘z rollarini o‘ynashlari shart. Albatta, jamoa chempion bo‘lishni juda xohlaydi va bunga intilyapti.

So‘nggi bir necha yil ichida «Manchester Yunayted» Erik ten Xag va Ruben Amorim bilan qiyin davrlarni boshdan kechirdi, ammo muxlislar doimo murabbiylar tomonida bo‘lib, stadionda ularni qo‘llashdi. Ular doim qo‘shiq aytib, jamoani qo‘llab-quvvatlashdi va juda kam hollarda hushtak chalishdi.

«Arsenal» butun mavsum davomida peshqadamlik qildi, Chempionlar ligasi yarim finaliga chiqdi, lekin «Bornmut»ga yutqazgani uchun (1:2) ularga hushtak chalishdimi?

Muxlislar futbolchilarga yaxshiroq munosabatda bo‘lishlari va ularni ko‘proq qo‘llab-quvvatlashlari kerak, chunki bunday holatlar o‘yinchilarning qalbini 100 foiz jarohatlaydi», – dedi Ueyn Runi.