«Barselona» klubining sobiq prezidenti Jozep Bartomeu Madridning «Real» klubi ham hakamlik tahlili uchun mutaxassislarni ishga yollagani haqida gapirib o‘tdi.
Eslatib o‘tamiz, avvalroq «Barselona» va uning rahbariyatiga Ispaniya Qirollik futbol federasiyasi (RFEF) Hakamlar texnik qo‘mitasi sobiq vise-prezidenti Xose Mariya Enrikes Negreyraga to‘lovlar amalga oshirilgani yuzasidan pora berish ayblovi qo‘yilgan edi.
«Nafaqat Ispaniyada, balki barcha futbol klublari hakamlar bo‘yicha hisobotlar tayyorlashadi. «Barselona»da bu ancha oldin yo‘lga qo‘yilgan. Men Rosel bilan klubga kelganimda, Xavyer Enrikes allaqachon hisobotlar tuzardi va biz buni o‘rinli deb hisobladik, chunki bu sport bo‘limining qarori va klubning doimiy amaliyoti edi.
Masalan, «Real Madrid»ni olsak, ular sobiq hakamni ishga yollashgan. Uning rafiqasi ayollar futbolidagi hakamlikni nazorat qiladi va hakamlar ishini baholash bo‘yicha ekspert hisoblanadi. Xo‘sh, agar ular professional tarzda harakat qilishsa va ular o‘rtasida nikohdan tashqari boshqa «aloqalar» bo‘lmasa, buni normal holat deb o‘ylayman», — dedi Bartomeu.
