«Барселона» клубининг собиқ президенти Жозеп Бартомеу Мадриднинг «Реал» клуби ҳам ҳакамлик таҳлили учун мутахассисларни ишга ёллагани ҳақида гапириб ўтди.
Эслатиб ўтамиз, аввалроқ «Барселона» ва унинг раҳбариятига Испания Қироллик футбол федерацияси (RFEF) Ҳакамлар техник қўмитаси собиқ вице-президенти Хосе Мария Энрикес Негрейрага тўловлар амалга оширилгани юзасидан пора бериш айблови қўйилган эди.
«Нафақат Испанияда, балки барча футбол клублари ҳакамлар бўйича ҳисоботлар тайёрлашади. «Барселона»да бу анча олдин йўлга қўйилган. Мен Росель билан клубга келганимда, Хавьер Энрикес аллақачон ҳисоботлар тузарди ва биз буни ўринли деб ҳисобладик, чунки бу спорт бўлимининг қарори ва клубнинг доимий амалиёти эди.
Масалан, «Реал Мадрид»ни олсак, улар собиқ ҳакамни ишга ёллашган. Унинг рафиқаси аёллар футболидаги ҳакамликни назорат қилади ва ҳакамлар ишини баҳолаш бўйича эксперт ҳисобланади. Хўш, агар улар профессионал тарзда ҳаракат қилишса ва улар ўртасида никоҳдан ташқари бошқа «алоқалар» бўлмаса, буни нормал ҳолат деб ўйлайман», — деди Бартомеу.
