«Manchester Siti» yarim himoyachisi Niko Gonsales Premyer-liga chempionligi uchun kechayotgan qizg‘in kurash borasida o‘z fikrlari bilan o‘rtoqlashdi.

Agar bugun «shaharliklar» safarda «Byornli» ustidan g‘alaba qozonsa, ochkolar borasida peshqadam «Arsenal»ga yetib oladi. Gonsalesning so‘zlariga ko‘ra, jamoa ayni damda faqat navbatdagi o‘yinga e’tibor qaratgan.

«Agar mavsum avvalida kimdir bizga chempionat tugashiga 5 tur qolganda chempionlik uchun kurashamiz desa, biz bunga jon-deb rozi bo‘lardik. Maqsadga juda yaqinmiz, ammo hozir bor e’tiborni «Byornli»ga qaratish lozim. Qadamma-qadam ilgarilab borishimiz shart.

Qilayotgan ishlarimizdan mamnunmiz. Menimcha, chempionlik uchun imkoniyatlar ayni damda 50-ga 50. Bizni ajoyib poyga kutmoqda, intriga oxirigacha saqlanib qoladi. Men jamoamizga ishonaman», — deya Nikoning so‘zlarini keltirmoqda City Xtra.

Eslatib o‘tamiz, «Manchester Siti» o‘tgan turda bevosita raqobatchisi «Arsenal»ni mag‘lub etgan (2:1) edi. «Byornli»ga qarshi bahs bugun Toshkent vaqti bilan soat 00:00 da start oladi.