«Manchester Yunayted»ning sobiq yarim himoyachisi Pol Pogba jamoa sardori Brunu Fernandeshning o‘yini borasida o‘z fikrlarini bildirib o‘tdi. Portugaliyalik futbolchi joriy mavsumda hayratlanarli natija ko‘rsatmoqda va Premyer-liganing bir mavsumdagi golli uzatmalar rekordini yangilashi kutilmoqda.

Pogba Rio Ferdinandning podkastida ishtirok etar ekan, Fernandeshning salohiyatiga yuqori baho berdi.

«Brununi «Manchester Siti»ga yuboring — shunda u «Oltin to‘p» uchun kurashadigan kuchli uchlikdan joy oladi», — dedi fransiyalik futbolchi.

Ma’lumot uchun, Pol Pogba 2022 yilda «qizil iblislar» safini tark etgan va ayni damda «Monako» a’zosi hisoblanadi. Brunu Fernandesh esa 2020 yildan buyon «Manchester Yunayted» sharafini himoya qilib kelmoqda.

Joriy mavsumda 31 yoshli yarim himoyachi «MYU» libosida barcha musobaqalarda 32 ta o‘yinda maydonga tushib, 8 ta gol va 19 ta golli uzatmani o‘z hisobiga yozdirib qo‘ydi.

Bundan tashqari, avvalroq futbolchiga Turkiyaning «Galatasaroy» klubi tomonidan jiddiy qiziqish bo‘layotgani haqida xabar berilgan edi.