Dortmundning «Borussiya» klubi sobiq bosh murabbiyi Nuri Shahin Madridning «Real» klubi yarim himoyachisi Arda Gyulerni o‘z jamoasiga jalb qilishga uringani haqida so‘zlab berdi.
Yosh turk futbolchisi «Fenerbaxche»dan «qirollik klubi»ga o‘tganidan keyingi ilk mavsumida maydonga kam tushgan bo‘lsa-da, ijaraga ketishni istamagan edi.
«Men Gyulerni o‘z jamoamda — «Borussiya»da ko‘rishni juda xohlagandim va uni ko‘ndirishga chindan ham harakat qildim. U esa: «Nima bo‘lishidan qat’i nazar, men «Real» asosiy tarkibidan joy olaman», deb javob berdi. Uning bu qarori menga juda yoqdi. Ko‘rib turganimizdek, u haqiqatan ham asosiy tarkibga kira oldi», — deya Madrid Zone Shahinning so‘zlarini keltiradi.
Arda Gyuler 2023 yilning yozidan buyon «qaymoqranglilar» sharafini himoya qilib kelmoqda. Fevral oyida u 21 yoshga to‘ldi.
