«Malyorka» bosh murabbiyi Martin Demikelis Ispaniya chempionatining aprel oyidagi eng yaxshi murabbiyi bo‘ldi. Bu haqda La Liga rasmiy sayti xabar bermoqda.
Ortda qolgan oy davomida «Malyorka» biror marta mag‘lubiyatga uchramadi. Demikelis shogirdlari 3 ta o‘yinda 2 ta g‘alaba va 1 ta durang qayd etishdi. Jumladan, jamoa Madridning «Real» klubini (2:1) va «Rayo Valyekano»ni (3:0) mag‘lubiyatga uchratgan bo‘lsa, «Valensiya» bilan bahsda (1:1) murosa yo‘lini tanladi.
So‘rovnoma yakuniga ko‘ra, Demikelis «Real Ovyedo» ustozi Almada hamda «Barselona» bosh murabbiyi Xansi Flikni ortda qoldirishga muvaffaq bo‘ldi. Ta’kidlash joizki, ovoz berish jarayonida 25 aprel kuni bo‘lib o‘tgan «Alaves»ga qarshi bahs inobatga olinmagan.
Ma’lumot uchun, Martin Demikelis «Malyorka»ni mart oyi boshida qabul qilib olgan va mavsum yakuniga qadar shartnoma imzolagan edi. Ushbu muvaffaqiyatli seriyadan so‘ng jamoa 35 ochko bilan turnir jadvalida 15-o‘ringa ko‘tarilib oldi. Argentinalik mutaxassis ilgari «Monterrey», «River Pleyt» hamda Myunxenning «Bavariya» klubi yoshlar va o‘rinbosarlar jamoalarida faoliyat yuritgan.
