«Manchester Yunayted» klubi yarim himoyachi Ederson Lourensoning transferi bo‘yicha ish boshladi. The Guardian nashrining xabar berishicha, mankunianliklar «Atalanta» futbolchisini joriy mavsum yakunida jamoani tark etadigan Kazemironing o‘rniga asosiy nomzod sifatida ko‘rishmoqda.
26 yoshli braziliyalik futbolchining iqtidoriga «Yunayted» sport direktori Jeyson Uilkoks yuqori baho bermoqda. Hozirda Edersonning transfer qiymati 40-50 million yevro atrofida baholanmoqda.
Shuningdek, ingliz klubining kengaytirilgan transfer ro‘yxatidan yana bir qator yarim himoyachilar o‘rin olgan. Ular orasida Orelyen Tchuameni («Real», 70 mln funt), Karlos Baleba («Brayton», 50 mln funt), Adam Uorton («Kristal Pelas», 60 mln funt) va Elliot Anderson («Nottingem Forest», 100 mln funt) bor.
Ma’lumot uchun, Ederson A Seriyaning joriy mavsumida 26 ta o‘yinda maydonga tushib, 1 ta gol urishga muvaffaq bo‘lgan.
