«Barselona» sobiq bosh murabbiyi Xavi Ernandes vinger Rafinya Diasning muvaffaqiyatlari haqida o‘z fikrini bildirdi.
Braziliyalik futbolchi jamoaga aynan ispaniyalik mutaxassis davrida kelgan edi, biroq o‘zining eng yaxshi o‘yinini Xans-Diter Flik qo‘l ostida ko‘rsata boshladi.
«Rafinyaning «Barselona»da ochilganidan xursandman. Biz unga juda ko‘p turtki bergan edik. U yaxshi yigit, mas’uliyatli, haqiqiy yetakchi va g‘olib. Ilgari braziliyalik futbolchilarda intizom bilan bog‘liq muammolar bo‘lardi, ular bo‘shashib, faqat o‘z iste’dodlariga tayanib qolishlari mumkin edi. Rafinyada esa bu borada hammasi joyida, u doimo mukammallikka intiladi», — deya «ko‘k-anorranglilar» sobiq ustozining so‘zlarini keltiradi Barca Universal.
Eslatib o‘tamiz, Xavi 2024 yilning may oyida «Barselona»dan iste’foga chiqarilgan edi.
