Londonning «Chelsi» klubi Angliya Kubogi yarim finalida «Lids» ustidan minimal hisobda (1:0) g‘alaba qozondi. «Ko‘klar»ning muvaffaqiyatini jamoa bosh murabbiyi vazifasini bajaruvchi Kalum Makfarleyn sharhladi.

«Bu juda og‘ir o‘yin bo‘ldi, chinakamiga qiyin bahs. Ushbu uchrashuvning eng yoqimli tomoni futbolchilarning ko‘rsatgan xarakteri bo‘ldi. Menimcha, bu yigitlar g‘alaba qozonishni qanchalik xohlayotganliklarini isbotlay olishdi», — dedi murabbiy.

Turnir finalida «Chelsi» «Manchester Siti»ga qarshi bahs olib boradi. Eslatib o‘tamiz, «shaharliklar» yarim finalda «Sautgempton» ustidan irodali g‘alabaga (2:1) erishgan edi. Angliya Kubogi finali 16 may kuni bo‘lib o‘tadi va Toshkent vaqti bilan soat 20:00 da boshlanadi.