Лондоннинг «Челси» клуби Англия Кубоги ярим финалида «Лидс» устидан минимал ҳисобда (1:0) ғалаба қозонди. «Кўклар»нинг муваффақиятини жамоа бош мураббийи вазифасини бажарувчи Калум Макфарлейн шарҳлади.

«Бу жуда оғир ўйин бўлди, чинакамига қийин баҳс. Ушбу учрашувнинг энг ёқимли томони футболчиларнинг кўрсатган характери бўлди. Менимча, бу йигитлар ғалаба қозонишни қанчалик хоҳлаётганликларини исботлай олишди», — деди мураббий.

Турнир финалида «Челси» «Манчестер Сити»га қарши баҳс олиб боради. Эслатиб ўтамиз, «шаҳарликлар» ярим финалда «Саутгемптон» устидан иродали ғалабага (2:1) эришган эди. Англия Кубоги финали 16 май куни бўлиб ўтади ва Тошкент вақти билан соат 20:00 да бошланади.