Ikki vazn toifasida UFC chempioni bo‘lgan rossiyalik Islam Maxachev navbatdagi jangiga tayyorgarlikni boshladi. Bu haqda jangchi jamoasi vakili Shamil Zavurov «Ushatayka» YouTube kanaliga bergan intervyusida ma’lum qildi.
Zavurovning so‘zlariga ko‘ra, Maxachev yarim o‘rta vazn toifasidagi chempionlik kamarini himoya qilish uchun allaqachon mashg‘ulotlarga kirishgan.
«Islam tayyorgarlikni boshlab yuborgan. Jang yaqin oylarda — iyul yoki avgustda bo‘lib o‘tadi. Hozircha raqib nomi aniq emas, muzokaralar qizg‘in davom etmoqda, ammo yakuniy qaror bizga hali e’lon qilinmadi», — dedi Shamil Zavurov.
Ehtimoliy raqib va jang sanasi
Avvalroq sport nashrlarida Maxachevning navbatdagi raqibi divizion reytingida ikkinchi o‘rinni egallab turgan irlandiyalik Yen Machado Gerri bo‘lishi mumkinligi haqida xabarlar tarqalgan edi. Jang o‘tkazilishi mumkin bo‘lgan sanalar sifatida ikkita asosiy variant ko‘rib chiqilmoqda:
-
11 iyul — Las-Vegasda bo‘lib o‘tadigan UFC 329 turniri;
-
15 avgust — Filadelfiya mezbonlik qiladigan UFC 330 turniri.
