Madridning «Atletiko» klubi bosh murabbiyi Diyego Simeone va «Arsenal» himoyachisi Ben Uayt o‘rtasida janjal kelib chiqdi.
Chorshanba oqshomida Madridda bo‘lib o‘tgan Chempionlar ligasi yarimfinal dastlabki uchrashuvi 1:1 hisobidagi durang bilan yakunlandi. Biroq bahsdan so‘ng stadionning tribuna osti yo‘lagiga kirish qismida ushbu voqea yuz berdi. Kameralar ob’ektiviga tushib qolgan epizodda Ben Uayt maydonni tark etayotib, chiqish eshigi yonidagi «Atletiko» logotipini bosib o‘tganini ko‘rish mumkin.
Angliyalik futbolchining bu harakati «matraschilar» a’zolari va murabbiy Diyego Simeonening keskin e’tiroziga sabab bo‘ldi. Argentinalik mutaxassisning tanbehi Uaytga yoqmadi va u murabbiyga javob qaytardi. Natijada ikki o‘rtada dahanaki jang va o‘zaro itartish yuzaga keldi.
Eslatib o‘tamiz, ushbu jamoalar o‘rtasidagi javob uchrashuvi 5 may kuni Londonda bo‘lib o‘tadi. Unda finalchi nomiga oydinlik kiritiladi.
