Мадриднинг «Атлетико» клуби бош мураббийи Диего Симеоне ва «Арсенал» ҳимоячиси Бен Уайт ўртасида жанжал келиб чиқди.
Чоршанба оқшомида Мадридда бўлиб ўтган Чемпионлар лигаси яримфинал дастлабки учрашуви 1:1 ҳисобидаги дуранг билан якунланди. Бироқ баҳсдан сўнг стадионнинг трибуна ости йўлагига кириш қисмида ушбу воқеа юз берди. Камералар объективига тушиб қолган эпизодда Бен Уайт майдонни тарк этаётиб, чиқиш эшиги ёнидаги «Атлетико» логотипини босиб ўтганини кўриш мумкин.
Англиялик футболчининг бу ҳаракати «матрасчилар» аъзолари ва мураббий Диего Симеоненинг кескин эътирозига сабаб бўлди. Аргентиналик мутахассиснинг танбеҳи Уайтга ёқмади ва у мураббийга жавоб қайтарди. Натижада икки ўртада даҳанаки жанг ва ўзаро итартиш юзага келди.
Эслатиб ўтамиз, ушбу жамоалар ўртасидаги жавоб учрашуви 5 май куни Лондонда бўлиб ўтади. Унда финалчи номига ойдинлик киритилади.
