Lissabonning «Benfika» klubi bosh murabbiyi Joze Mourinyo yana Madridning «Real» klubini boshqarish istagida. Jurnalistlar Xoakin Maroto va Ramon Alvaresning xabar berishicha, portugaliyalik mutaxassis «qirollik klubi»ga qaytish uchun allaqachon o‘z xizmatlarini taklif qilgan.

Biroq, bu qaytish yo‘lida jiddiy moliyaviy va strategik to‘siqlar mavjud. Asosiy muammo — Mourinyoning «Benfika» bilan 2027 yilgacha mo‘ljallangan shartnomasidagi tovon puli. «The Special One»ni Madridga olib kelish uchun «Real» Lissabon klubiga 6 million yevro to‘lashi kerak.

Madridliklar rahbariyati esa Joze uchun o‘tgan yili Xabi Alonso uchun to‘langan mablag‘dan (taxminan 8–15 mln yevro atrofida) ko‘p pul sarflamoqchi emasliklarini ochiq bildirishgan. Qayd etish joizki, «Real» hozirda Alvaro Arbeloa boshchiligida bo‘lsa-da, klub kelasi mavsum uchun asosiy nomzod sifatida Yurgen Kloppni ko‘rmoqda.