«Monako» hujumchisi Ansu Fati bo‘lajak jahon chempionatida Ispaniya terma jamoasi safida ishtirok etish umididan voz kechgani yo‘q. «Barselona»dan ijaraga olingan futbolchi Fransiyadagi joriy mavsumni munosib tarzda o‘tkazmoqda va «qizil furiya» ustozi Luis de la Fuente uni mundial uchun yakuniy qaydnomaga kirishi mumkin bo‘lgan futbolchilarning kengaytirilgan ro‘yxatiga kiritdi. Jurnalist Laya Tudelning qayd etishicha, Fatining yaqinlari 23 yoshli forvardning tarkibga tushish ehtimoli yuqori emasligini tushunishsa-da, bunday ssenariyni imkonsiz deb hisoblashmayapti.
Ansu Fati «Monako» safida joriy mavsumda 27 ta o‘yinda maydonga tushib, o‘z hisobiga o‘nta gol yozdirib qo‘ydi. «Barsa» tarbiyalanuvchisi Ispaniya milliy terma jamoasidagi so‘nggi uchrashuvini 2023 yilning oktyabr oyida o‘tkazgan edi.
