Angliya chempionatida 35-tur bahslari boshlandi va «Lids» o‘z maydonida «Byornli»ni mag‘lub etib (3:1), katta muvaffaqiyatga erishdi. Endilikda klubning APLni tark etishi uchun faqat «fantastik» turnir ssenariysi sodir bo‘lishi kerak, xolos. Bunday holatdan «Lids» ustozi Daniel Farkening boshi osmonda.

«Bu biz uchun eng muhim natija. Qo‘shimcha kubok o‘yinlari bilan bog‘liq barcha qiyinchiliklarga qaramay, biz vazifani deyarli bajardik. Endi raqobatchilarimiz asabiylashayotgan bir paytda, biz nisbatan xotirjam harakat qilishimiz mumkin. Yana bir bor futbolchilarga katta rahmat aytaman», — deya Farkening so‘zlaridan iqtibos keltirmoqda BBC Sport.

35 ta o‘yindan so‘ng «Lids» hisobida 43 ochko bor va jamoa turnir jadvalida 14-o‘rinni egallab turibdi. Bu natija ularga ligada qolish uchun mustahkam zamin yaratdi.