«Yuventus» «Barselona» hujumchisi Robert Levandovski uchun da’vogarlar qatorida qolmoqda. Taxminlarga ko‘ra, polyak futbolchisi joriy mavsum yakunida erkin agentga aylanadi.

Gazzetta dello Sport nashri bergan ma’lumotlarga ko‘ra, «byankoneri» 37 yoshli futbolchi uchun kurashdan chiqqani yo‘q, biroq avval Dushan Vlaxovich bilan bog‘liq vaziyatni hal qilib olmoqchi — uning ham shartnomasi yozda yakuniga yetadi. Bu masala hal bo‘lmaguncha, yangi xaridlar bo‘yicha biror aniq qadam tashlanishi amrimahol.

Robert Levandovskining «Barselona»dan ketishi hozircha rasman tasdiqlanmagan, ammo tez orada hujumchining kelajagiga oydinlik kiritilishi kutilmoqda. Mavjud ma’lumotlarga ko‘ra, Kataloniya grandi futbolchiga maoshi sezilarli darajada kamaytirilgan bir yillik shartnoma taklif qilmoqda.