Madridning «Real» klubi rasmiy sayti orqali jamoaning 34 yoshli himoyachisi va sardori Daniel Karvaxalning jarohati haqida ma’lum qildi.

«Real» tibbiy xizmati tomonidan o‘tkazilgan tekshiruvlardan so‘ng futbolchimiz Daniel Karvaxalda o‘ng oyoqning beshinchi barmog‘i distal falangasida yoriq aniqlandi. Hozircha vaziyat rivojini kutmoqdamiz», — deyiladi «qaymoqranglar» bayonotida.

Oktyabr oxiridan yanvargacha Karvaxal tizzasi jarohati sabab 12 ta o‘yinni o‘tkazib yuborgan edi. Sentyabrdan oktyabrgacha esa himoyachi mushak jarohatidan tiklangan.

Joriy mavsumda Karvaxal barcha musobaqalarda 20 ta o‘yinda ishtirok etdi va hozircha samarali harakatlar bilan ajralib tura olmadi. Uning klub bilan amaldagi shartnomasi 2026 yil yozigacha mo‘ljallangan. Transfermarkt ma’lumotiga ko‘ra, futbolchining bozor qiymati 6 million yevroga baholanmoqda.