«Bavariya» bosh murabbiyi Vensan Kompani Bundesliganing 32-turida «Xaydenxaym» bilan qayd etilgan durang (3:3) haqida o‘z fikrlarini bildirib o‘tdi.
«Biz doimo raqibni hurmat qilishimiz lozim. Ligada jon saqlab qolish uchun kurash ba’zida jamoalarga katta kuch bag‘ishlaydi.
Birinchi bo‘lim «Xaydenxaym» uchun yaxshi kechdi, biz uchun esa yo‘q. Tushunaman, hamma narsa doim ham ideal bo‘lavermaydi, lekin qayta-qayta hisobni tenglashtirishga kuch topa olganimiz — bu o‘z-o‘zidan bo‘ladigan oddiy holat emas.
Endi bu o‘yin o‘tmishda qoldi, barcha futbolchilar safda. Biz aynan shuni istagan edik. Endi bor e’tiborimizni chorshanba kungi [«PSJ»ga qarshi] uchrashuvga qaratishimiz mumkin», — dedi Kompani.
