Bundan roppa-rosa o‘n yil avval «Lester» rasman raqiblari uchun yetib bo‘lmas masofaga chiqib oldi va chempionlikni rasmiylashtirdi. Bu voqea «Tottenxem» 36-turning so‘nggi o‘yinida «Chelsi» bilan bahsda ikki ochko yo‘qotganidan so‘ng yuz berdi. Natijada «shporlar» o‘zi ham durang o‘ynagan «Lester» bilan oradagi 7 ochkolik farqni qisqartira olishmadi.

O‘sha vaqtda, chempionat yakuniga ikki tur qolganida Klaudio Ranyeri jamoasida 77 ochko, «Tottenxem»da esa 70 ochko mavjud edi. Ta’kidlash joizki, «shporlar» yakunda hatto ikkinchi o‘rinni ham saqlab qola olishmadi — ularni azaliy raqiblari «Arsenal» quvib o‘tdi. «Tottenxem» bugungi kunda ham APLda (kelasi mavsumda ham u yerda qolishiga kafolat bo‘lmasa-da), «Lester» esa uchinchi divizionga tushib ketdi...