Superliganing 11-turidan o‘rin olgan uchrashuvda Olmaliqning OKMK jamoasi Farg‘onaning «Neftchi» klubini qabul qildi.

Bellashuv kutilganidek shiddatli boshlandi. Mezbonlar o‘yinning ilk daqiqalaridanoq faol harakat qildi va bir qator xavfli hujumlar uyushtirdi. Xususan, 18-daqiqada Aziz Xolmurodovning faolligi ortidan yaratilgan vaziyatda Nodirbek Abdurazzoqov va Urosh Koyich bosh bilan zarba berdi, ammo «Neftchi» posboni Botirali Ergashev jamoasini goldan saqlab qoldi.

Mehmonlar ham javobsiz qolmadi. Birinchi bo‘lim davomida bir necha xavfli vaziyatlar yuzaga keldi, ammo hisob ochilmadi.

Ikkinchi bo‘limda o‘yin yanada ochiq tus oldi. Har ikki jamoa gol urish uchun imkoniyatlar yaratdi. «Neftchi» hujumlarida Abrór Ismoilovning xavfli zarbasini OKMK darvozaboni Javohir Ilyosov mahorat bilan qaytardi.

Uchrashuvning eng faol o‘yinchilaridan biri aynan Ilyosov bo‘ldi. U bir nechta murakkab vaziyatlarda jamoasini muqarrar gollardan saqlab qoldi, jumladan, ikkinchi bo‘lim oxiridagi dabl-seyv muxlislar e’tiborini tortdi.

Qolgan vaqtda hisob o‘zgarmadi va uchrashuv 0:0 hisobida yakunlandi.

Shu tariqa, "Neftchi" yomg‘ir ostida kechgan Olmaliqdagi o‘yinda ikki ochko yo‘qotdi va o‘z ochkolarini 28 taga yetkazib, peshqadamlikni mustahkamladi. "Paxtakor" bugun "Surxon"ni mag‘lub etsa, farg‘onaliklar bilan tenglashib oladi. OKMK esa 16 ochko 6-pog‘onani egallab turibdi.

Superliga, 11-tur
3 may, yakshanba
OKMK — «Neftchi» 0:0