2026 yilgi futbol bo‘yicha jahon chempionatiga mezbonlik qiluvchi AQSH shaharlarida mehmonxonalarga bo‘lgan talab kutilganidan ancha past bo‘lib chiqmoqda. Musobaqa 11 iyundan 19 iyulgacha bo‘lib o‘tishi rejalashtirilgan bo‘lsa-da, hozirda ko‘plab mehmonxonalarda bo‘sh joylar yetarlicha, deb xabar bermoqda RMC Sport.
AQSHning 30 mingdan ortiq muassasasini birlashtirgan Mehmonxonalar va joylashtirish vositalari assosiasiyasi (AHLA) ma’lumotlariga ko‘ra, chempionat o‘tkaziladigan 11 ta shahardagi mehmonxonalarning aksariyati band qilish ko‘rsatkichlaridan qoniqmayapti. O‘tkazilgan so‘rovnomada ishtirok etgan respondentlarning qariyb 80 foizi band qilingan joylar soni «dastlabki prognozlardan ancha past» ekanini ma’lum qilgan.
Buning natijasida aksariyat mehmonxonalar narxlarni tushirishga majbur bo‘lmoqda. Shuningdek, talab pastligi va noaniqliklar tufayli ayrim muassasalar JCH-2026 bilan bog‘liq tadbirlarga investisiya kiritishni, brendlar bilan hamkorlik dasturlarini va vaqtinchalik ta’mirlash ishlarini to‘xtatib qo‘ygan.
Mutaxassislarning ogohlantirishicha, agar band qilish darajasi pastligicha qolsa, mezbon shaharlar FIFA va boshqa tashkilotlar tomonidan va’da qilingan soliq tushumlarini to‘liq ololmasligi mumkin. Bu esa turnirdan kutilayotgan iqtisodiy foyda kutilganidan ancha kam bo‘lishini anglatadi.
