Leverkuzenning «Bayer» klubi chap qanot himoyachisi Alexandro Grimaldo Yevropa grandlari e’tiborida bo‘lib turibdi. Avvalroq ispaniyalik futbolchiga da’vogarlar qatorida «Barselona» va «Milan» nomlari tilga olingandi, shuningdek, «Bavariya» haqida ham mish-mishlar tarqalgan edi.

Tuttosport nashri bergan ma’lumotlarga ko‘ra, Grimaldoni o‘z safiga qo‘shib olish imkoniyatini «Yuventus» ham ko‘rib chiqmoqda. Turinliklar ushbu o‘yinchini uch yildan beri kuzatib kelishmoqda. 30 yoshli futbolchining amaldagi shartnomasi bir yildan so‘ng yakuniga yetadi, shu sababli u 15 million yevro evaziga sotilishi mumkin.

Joriy mavsumda Alexandro Grimaldo «Bayer» tarkibida barcha turnirlarda 44 ta o‘yinda maydonga tushib, 14 ta gol urdi va 12 ta golli uzatmani amalga oshirdi. Transfermarkt ekspertlari lateralning bozor qiymatini 24 million yevroga baholamoqda.