«Real Madrid» va «Bavariya» sobiq futbolchisi Toni Kroos «PSJ» muvaffaqiyatlarining asosiy omillaridan biri sifatida murabbiy Luis Enrikening Usmon Dembele bilan til topisha olganini ko‘rsatdi. Eslatib o‘tamiz, o‘tgan yili aynan Dembele «Oltin to‘p» sohibiga aylangan edi.
«Luis Enrike dunyoning eng yaxshi futbolchisi bo‘lib turgan Dembeleni 65-daqiqada zaxiraga oldi. U esa murabbiyning qo‘lini siqib, hech qanday e’tirozsiz maydonni tark etdi va zaxira o‘rindig‘idan turib jamoadoshlarini qizg‘in qo‘llab-quvvatladi. Bu ular o‘rtasida qanchalik hurmat va yaxshi munosabat shakllanganini ko‘rsatadi. Luis Enrike Dembele uchun kalit topa oldi», — deya Kroosning so‘zlarini derbyderbyderby.it nashri keltirmoqda.
Ma’lumot uchun, Dembele ham xuddi Kroos kabi o‘z vaqtida Germaniya chempionatida o‘ynagan — Toni «Bavariya» sharafini himoya qilgan bo‘lsa, Usmon Dortmundning «Borussiya»si tarkibida to‘p tepgan.
